“Kòrsou komo hub logístiko pa ayudo humanitario”

WILLEMSTAD.- CHATA a tuma nota di e desishon di gobièrnu pa permití Kòrsou di ser utilisá komo un hub logístiko pa ayudo humanitario pa Venezuela i tambe di e preokupashonnan aktual ku ta eksistí denter di nos komunidat en konekshon ku e desishon. CHATA komo representante di e sektor di turismo privá a bai analisá e posishon di gobièrnu di un forma minusioso i a diskutí e implikashonnan ku diferente aktor denter di komunidat. CHATA a yega na e konklushon ku ta na interes di nos isla i nos hendenan pa sostené gobièrnu den su desishon.

Promé ku tur kos, CHATA ta kere ku sosten di ayudo humanitario pa hendenan di Venezuela ta algu humano pa hasi. Kòrsou tin konekshonnan históriko largu ku Venezuela den kual e komunidat venezolano a kontribuí aktivamente na e bienestar ekonómiko dje isla. I esaki ta meresé di haña e sosten ku gobièrnu lo ke duna e pueblo venezolano.

Es mas, CHATA ta sostené ayudo humanitario pa Venezuela, mirando ku un deterioro mas aleu dje situashon na Venezuela no ta na benefisio di nos isla. E situashon polítiko i ekonómiko turbulento na Venezuela a afektá Kòrsou negativamente kaba den e añanan ku a pasa. E industria di turismo por ehèmpel a mira un bahada drástiko den e kantidat di bishitante for di Venezuela. Ta un merkado ku un tempu tabata nos di dos merkado mas grandi den turismo. Esaki a resultá den un bahada mas aleu den gastunan i tambe kresementu ekonómiko, djis pa menshoná algun.

Segun CHATA, pa e motibunan ku el a menshoná aki e lo sostené e desishon di gobièrnu pa Kòrsou ser utilisá komo hub pa ayudo humanitario eksklusivamente. Esaki naturalmente si nan ta kumpli ku e kondishonnan ku gobièrnu a stipulá, di kual pa CHATA esnan mas signifikante lo mester ta:

• Kòrsou solamente lo ser utilisá komo un hub pa ayudo humanitario si Venezuela ta permití pa un entrada pasífiko i pa distribushon di e ayudo.
• Den e transferensia di ayudo humanitario pa Venezuela, ekipo òf akshonnan militar di ningun tipo no por ser usá.

CHATA a haña ta imperativo pa gobièrnu i tur aktor envolví pa nan sigui duna klaridat pa loke ta e desaroyo, implikashonnan i ehekushon aktual di e hub logístiko pa aktornan lokal i e komunidat den su totalidat. Mas ainda, CHATA ta spera ku komunidat lo por yega na un entendimentu den e situashon aki i ku nos lo por aliniá nos esfuersonan den asistí nos pais bisiña ku ta den nesesidat.